मंडळाचा वर्धापन दिन

दि. ५ मे २०१३ रोजी श्री चैत्रावली मंडळाचा वर्धापन दिन व स्नेहभोजन असा संयुक्तिक कार्यक्रम कालिदास कॅफे, मुलुंड येथे मोठ्या दिमाखात पार पडला. दोन सत्रामध्ये साजरा झालेल्या या कार्यक्रमाची प्रथम प्रार्थनेने सुरुवात झाली. कार्यवाह सौ. पल्लवी लिखिते यांनी सर्वांचे स्वागत केले. कार्यक्रमाचे प्रमुख पाहुणेपद भूषविले होते सौ. सुचित्रा हेमंत रणदिवे यांनी!

वर्धापन दिनाच्या नेहमीच्या शिरस्त्या प्रमाणे कार्यवाह सौ. पल्लवी लिखिते यांनी वार्षिक अहवाल वाचून दाखविला. कोशाघ्यक्ष सौ. सुनिता दिघे यांनी वार्षिक जमाखर्चाचे वाचन केले.मंडळाच्या अध्यक्षा श्रीमती नीला प्रधान यांनी प्रमुख पाहुण्यांचा पुष्पगुच्छ देवून सत्कार केला व आपले मनोगत व्यक्त केले. चैत्रावली महिला मंडळाचे कार्यक्रम सुरळीतपणे पार पडण्यासाठी सर्वच सभासद भगिनींचा उत्साही सहभाग असतो असे त्यांनी सांगितले. तसेच स्नेहान्कीताच्या   कार्यालयाची जबाबदारी दोन वर्षासाठी मंडळाने स्वीकारली आहे त्यासाठीही सर्वच भगिनी मदतीचा हात पुढे करतात त्याबद्दल त्यांनी भगिनींचे कौतुक केले.

प्रमुख पाहुण्यांच्या हस्ते मंडळातील ६० वर्षे व ७५ वर्षे पूर्ण केलेल्या भगिनींचे सत्कार करण्यात आले. तसेच विविध स्पर्धांमध्ये भाग घेवून प्राविण्य मिळविलेल्या भगिनींना पारितोषिके देण्यात आली. प्रमुख पाहुण्यांनी आपल्या छोट्याशा भाषणात मंडळाच्या कार्याचे व भगिनींचे कौतुक केले व यापुढेही मंडळाला त्या व त्यांचे पती श्री. हेमंत रणदिवे हे पूर्ण सहकार्य करतील असे आश्वासन दिले.

दुसऱ्या सत्रात मंडळाच्या सभासद भगिनींनी विविध कार्यक्रम सदर करून आपल्या अंगातील कलागुण दाखविण्याची संधी साधून उपस्थित भगिनींचे मनोरंजन केले.

बऱ्याच जणींना नेहमी मंडळात येण्यास जमत नाही. परंतु वर्धापन दिनाच्या ह्या कार्क्रमात बऱ्याच जणी आवर्जून उपस्थित राहतात व मंडळाचा उत्साह वाढवतात.

कार्यक्रमाचे सूत्रसंचालन कार्यवाह सौ. पल्लवी लिखिते व कार्याध्यक्ष सौ. भारती पोतनीस यांनी केले. सहकार्यवाह सौ. चित्रा देशमुख यांनी सर्वांचे आभार मानले. त्यानंतर रुचकर अशा सामिष भोजनाने कार्यक्रमाची सांगता झाली.